نگران وزیراعظم کی سربراہی میں بجلی کے زائد بلوں سے متعلق اجلاس آج پھر ہوگا

اسلام آباد: نگران وزیراعظم انوار الحق کاکڑ کی زیر صدارت بجلی کے زائد بلوں سے متعلق اجلاس آج پھر ہوگا۔
گزشتہ روز ہونے والے اجلاس میں نگران وزیراعظم انوار الحق کاکڑ نے عوام کو زیادہ سے زیادہ ریلیف دینے کیلئے اقدامات کی ہدایت کی تھی، تاہم 2 گھنٹے سے زائد رہنے والے اجلاس میں بجلی بل کے ستائے عوام کو فوری طور پر ریلیف دینے کا فیصلہ نہ ہوسکا تھا۔
اب بجلی کی قیمتوں میں کمی سے متعلق اجلاس آج پھر ہوگا جس میں جولائی کے زائد بلوں کے مسئلے پر صوبائی وزرائے اعلیٰ کے ساتھ تفصیلی مشاورت ہوگی۔
نگران وزیراعظم انوار الحق کاکڑ نے بجلی کی قیمتوں میں کمی کے لیے ٹھوس اقدامات کی تجاویز آئندہ48 گھنٹوں میں طلب کی ہیں۔
گزشتہ روز بجلی کی قیمتوں سے متعلق اجلاس میں کہا گیا تھا کہ ایسا ممکن نہیں کہ عام آدمی مشکل میں ہو اور افسر شاہی اور وزیراعظم ان کے ٹیکس پر مفت بجلی استعمال کریں، نگران حکومت اپنے مینڈیٹ کے اندر رہتے ہوئے جلد از جلد عوام کو زیادہ سے زیادہ ریلیف دینے کی کوشش کرے گی۔
اجلاس میں مزید کہا گیا کہ نگران حکومت جلد بازی میں کوئی ایسا اقدام نہیں اٹھائی گی جس سے ملک کو نقصان پہنچے بلکہ ایسے اقدامات کریں گے جس سے ملکی خزانے پر اضافی بوجھ نہ پڑے اور صارفین کو سہولت ملے۔

اپنا تبصرہ بھیجیں