بائپر جوائے سے بھارت میں بھی تباہی کا خدشہ، الرٹ جاری، پروازیں منسوخ

ممبئی: سمندری طوفان بائپر جوائے نے بھارت کا بھی رخ کر لیا، گجرات، مہاراشٹر اور گوا سمیت ساحلی علاقوں میں الرٹ جاری کر دیا گیا۔
بھارتی میڈیا کے مطابق ریاست گجرات میں بھی طوفان بائپرجوائے کے سبب تیز ہوائیں چل رہی ہیں اور سمندر میں لہریں بلند ہیں جبکہ بائپر جوائے کے زیر اثر گجرات کے اضلاع میں 13 سے 15 جون تک شدید بارشیں متوقع ہیں۔
بھارتی میڈیا کا کہنا ہے کہ گجرات کے اضلاع میں 13 سے 15 جون تک 150 کلو میٹر فی گھنٹہ کی رفتار سے ہوائیں چلنے کا امکان ہے۔
بھارتی میڈیا کے مطابق محکمہ موسمیات نے کچ اور سوراشٹرا کیلئے الرٹ جاری کر دیا۔
ممبئی میں طوفان کے زیر اثر ہواؤں کی وجہ سے متعدد پروازیں منسوخ کر کے رن ویز بند کر دیئے گئے ہیں اور شہر میں یلو الرٹ جاری کیا گیا ہے۔
محکمہ موسمیات کی جانب سے ماہی گیروں کو 12 سے 15 جون تک سمندر نہ جانے کی ہدایت کی گئی ہے۔