شہباز شریف اور مولانا فضل الرحمان کا سپریم کورٹ کے فیصلے پر اظہار اطمینان

اسلام آباد:پاکستان مسلم لیگ (ن) کے صدر شہباز شریف اور پاکستان ڈیمو کریٹک موومنٹ (پی ڈی ایم) کے سربراہ مولانا فضل الرحمان نے سپریم کورٹ کے فیصلے پر اطمینان کا اظہار کر دیا ہے۔سپریم کورٹ کے باہر میڈیا سے گفتگو کرتے ہوئے مولانا فضل الرحمان نے کہا کہ کل پورے ملک کے کونے، کونے میں یوم تشکر منایا جائے گا، یوم تحفظ آئین پاکستان کو یوم تشکرمیں تبدیل کیا جا رہا ہے، یہ قوم کی فتح ہے، عدلیہ نے قوم کی امیدوں پر پورا اترتے ہوئے بڑا اطیمنان بخش فیصلہ دیا ہے۔انہوں نے مزید کہا کہ پوری قوم کو مبارکباد دیتا ہوں، جمہوریت آئین اور عوام کی فتح ہے، عدلیہ قوم کی امیدوں پر پوری اتری ہے، کل یوم احتجاج نہیں یوم تشکر ہوگا، پاکستان کے استحکام کے لئے دعا کریں گے، اللہ پاک پاکستان کو معاشی اور دیگر مشکلات سے نکالے۔
پاکستان مسلم لیگ (ن) کے صدر میاں شہباز شریف کا کہنا تھا کہ مولانا کی باتوں کی پوری تائید کرتا ہوں، اللہ نے 22 کروڑ عوام کی دعائیں قبول کیں، عدالت نے ایسا فیصلہ دیا آئین اور پاکستان بچ گیا، عدلیہ نے اپنے فیصلے سے چار چاند لگائے، عدالت نے پارلیمان کو مضبوط کیا ہے، یہ رمضان میں عوام نے بہت بڑا معرکہ سرکیا ہے، غربت، مہنگائی کے خلاف ہم مل کر لڑیں گے، اللہ کا جتنا شکر ادا کریں کم ہے۔شہباز شریف نے صحافی کے سوال کا جواب دیتے ہوئے کہا کہ بلاول بھٹو تشریف لا رہے ہیں، قوم یوم نجات منائے گی، ہم جعلی نہیں اصلی سرپرائز دیں گے۔پاکستان مسلم لیگ (ن) کی نائب صدر مریم نواز نے ٹوئٹ کیا کہ شکر الحمدُ للّٰہ ربّ العالمین، ‏قوم کو آئین کی سر بلندی بہت بہت مبارک، آئین توڑنے والوں کا کام ہمیشہ کے لیے تمام ہوا، اللّہ پاکستان کو چمکتا دمکتا رکھے، ساتھ ہی انہوں نے اپنے ٹوئٹ میں ‏وزیرِ اعظم شہباز شریف انشاءاللّہ بھی لکھا۔پاکستان پیپلز پارٹی کے چیئرمین بلاول بھٹو زرداری نے سپریم کورٹ کے فیصلے پر کہا کہ جمہوریت بہترین انتقام ہے، جئے بھٹو، جئے عوام، پاکستان زندہ باد۔